زوجة قامت من النوم بعد ما راح زوجها لشغله ب5 ساعات وبعد ما افطرت وشافت برامج الصباح والضحى حست بشي غريب يدفعها نحو السناعه
وقالت في نفسها :الى متى وانا طول اليوم نوم وتلفزيون وتلفون
ليه ما اكون ست بيت زي اللي دائما بيهرجوا عنهم امي وستي وام زوجي؟
الحكايه كلها شوية ترتيب وتنظيف ما تاخود مني الا ساعتين او اقل
وتكبرني في عين زوجي واوم زوجي وامي وستي ..
وذبت الريموت ولبست المريله وقمت تجتلد في ذا البيت تنظف وتغسل وتمسح وتكبب الزبايل وخلصت من تنظيفه وترتيبه وتبخيره قبل يرجع زوجها من الدوام
يوم خلصت كالعاده قعدت تحاكي نفسها لانها من الصبح الى الظهر ما تلقى احد تحاكيه فتضطر تكون صديقة نفسها اقول قعدت تقول لنفسها :والله انو مافش اسهل من ان الزوجه تكون ست بيت مميزه او زي مابتقول جارتنا القصيميه عن اختها.. انها حورمتن سنعه ايش هادي سنعه ..بلافشكلكم يالشروق انتم ولهجاتكم اللي ابشع منها مافيش
ياسلام دحين لما يجي جوزي ما راح يصدق ان هاد بيتنا .. يوم رجع زوجها وشاف البيت كذا قال : ايش النظافه هادي والترتيب هادا والريحه الطيبه هادي
الله يديك العافيه يا ام غسان لو ما كنتي زوجتي واعرفك تمام واعرف فيونكتك العشبيه هادي كنت افتكرت اني دخلت جناح من اجنحة الهيلتون بعد شوي قال لها وهو قاعد يلبس وزاره اكيد باقي بس عليك رمي النفايات وانتظرتيني عشان ارميها عنك
قالت : لا ياحبيبي انا لبست عبايتي ورميتها كلها
قال : ايييييييييييييش رميتي النفايات كلها
وراح يركض للمستودع وهو يركض طاح وزاره وما بقى عليه الا هاف
ورجع لها وهو يصارخ ويقول فييييين كيس العيش الكبير؟
وطلع للشارع وهوناسي ان وزاره طايح هي طايرتن بوهتها ما تدري وش اللي جا زوجها ..وقعدت تقول : لاحول ولاقوة الا بالله ..باين ان الراجل انهبل في عقلو مسكين ابو غسان اول مره يشوف البيت مرتب بالطريقه هادي ورجع لها وهو يتنافض ويقول : فين كيس العيش ياهووووه؟ قالت : رميتو قال رميتيه هو كمان : يارب يرموكي في قونتانامو ياست يا هبله
قالت : ليه ليه ليه لسا دحين كنت بتقول عن البيت انو هيلتون
قال : هيلتون ..هاه !! انتي صدقتي البكش اللي قلتو عشان اديك جوك
قالت : استغفر الله العظيم ..ايش اللي قلب حالك يا راجل يا بكاش؟
كول هادا عشان كيس عيش معفن لايودي ولا يجيب كيس معفن هاه
الكيس المعفن هادا يا هبله كنت مخبي فيه تحويشة العمر مئة الف ريال ..ريال ينطح ريال ..ثور لما ينطحك بلافشكلك اعمل فيكي ايه دحين ؟؟اعمل فيكي ايه؟ ربنا ينتقم منك ..قالت له : يا راجل يا اللي ما تستحي ..ياراجل يا بخيل فيه حد عقلو فراسو يرمي مبلغ زي هادا في كيس عيش معفن؟ خلاص مافش سقه في زوجتك يا بخيل؟
قام و سفها, ولبس وزاره وراح يبلغ الشرطه لعل وعسى يلقون فلوسه..
اما زوجته فقعدت تصيح تصيح لين غرقت فيونكتها من الدموع .
ليست هناك تعليقات:
إرسال تعليق